本文由 精神健康基金會 www.hkmhf.org 授權轉載。
本文經 fullcup.hk 節錄及配圖。
主持：李珊珊小姐（珊） 嘉賓：林中鍵醫生 （林）
珊：林醫生你好呀！你都知我好鍾意食嘢架嘛，所以我想知道飲食同我哋精神健康其實有無關係架呢？我怕自己會食錯嘢呀！
林：有句說話，叫you are what you eat係嗎？即係你食啲咩你就會係一個點樣嘅人。（雖然）我唔肯定係咪個個鍾意食甜嘢嘅女仔都一定會係甜姐兒啦，不過從我哋精神科醫生嘅角度嚟睇，飲食的確同我哋情緒同精神健康係幾有關係架喎。
如果我哋腦部健康，運作得好，我哋日常生活情緒就容易正面開心。而點樣可以令到腦部運作得好呢？食物就係其中一樣好直接嘅因素啦。
因為我哋個腦其實係一啲lipid fat (脂質脂肪) 嚟嘅。只要我哋嘅食物入面有一啲好嘅脂肪，就可以俾到營養腦部啦。
珊：咁咩食物先有好嘅脂肪呢？
林：就係魚呀、橄欖油、牛油果、葵花籽油依類含有omega3、omega6嘅食物，呢啲係必需脂肪酸，對於腦細胞生長好有幫助，大家可以食多啲。
珊：嘩，今晚就整個三文魚橄欖牛油果沙律呀！
林：除咗lipid fat，血清素、多巴胺都係會令我哋心情愉快嘅元素，又可以喺咩食物度可以搵到佢哋呢？薯仔、大豆、綠色嘅蔬菜，就含有製造血清素的元素啦；而蛋白質食物好似紅肉，就有較多製造多巴胺的元素啦
珊：咁又想問下乜嘢唔好食咁多呢？
林：要避開少食嘅就係反式脂肪啦，例如煎炸食物，特別佢哋會令血管收窄，令血上腦的情況變差，腦部就自然運作得唔好，又例如味精啦，都係一啲化學品，會影響腦部架。
珊：近年我哋成日會聽到comfort food呢個字。即係每當唔開心或者有啲情緒低落嘅時候，食咗佢就好似會馬上開心返咁。我自己都有架，每次心情麻麻，一食xxxxxx我就好似會開心好多，其實comfort food依樣嘢係有無根據架呢？
林：comfort food好多人都有嘅，好似我都好喜歡食壽司、刺身，每次食都真係會好滿足。
不過Comfort food係咪真係可以令大家輕鬆啲情緒好啲呢？
我會咁形容啦， comfort food係一種治標唔治本嘅方法。
從心理上面講，當下得到滿足，自然係會開心一啲，所以我哋都唔反對大家食comfort food嘅。
只不過真係從營養上嚟講，就未必一定可以幫助到腦部有效益咁運作啦。
但係又咁講，依個都好睇大家嘅comfort food係咩食物嚟嘅，如果你話你嘅comfort food係炸薯條，咁就除左當下滿足咗之外，真係唔多有益啦；但又例如，我知道好多人嘅comfort food係朱古力，咁又真係有用喎，因為咁啱得咁蹺，朱古力含有豐富製造多巴胺的元素，所以食完的確會令人開心咗。
珊：不過我知無論你嘅comfort food係咩都好啦，都要遵守一個原則，就係 唔好過量。
林：無錯啦。
因為我都曾經見過有啲個案，一唔開心就去食自己鍾意食的食物，例如食幾件牛扒、去食成桶雪糕咁，結果暴飲暴食令身體健康有問題，甚至有上癮的情況，反而愈食愈唔開心，令自己有更大精神壓力。
用酒嚟做一個例子就正好啦。
我自己間中都會飲下酒嘅，飲酒的確會令人放鬆啲，開放一啲；不過大家都有聽過「酒入愁腸愁更愁」係咪？
原來係真架喎，因為酒會令人將情緒放大，開心嘅時候飲會更開心，但唔開心嘅時候飲呢，就會更加唔開心。如果用酒作為自己comfort food，初時可能有啲幫助，但亦有機會愈飲愈唔開心，甚至有酗酒嘅問題。
所以如果真係要學識點樣透過飲食去令自己情緒同精神健康好一啲，記得個關鍵字應該係good food，而唔係comfort food。
珊：咁同咩人食、邊度食，或者幾時食咁又同精神健康有無關係呢？
林：咁一啲外在環境都有影響嘅。因為人始終都係一種社交動物嚟嘛，食飯都唔單只為咗充飢或者營養，如果係同自己嘅家人朋友一齊食飯，又或者用餐地方環境舒適，又唔需要好趕咁食飯，定時食飯等等，都可以令自己食得好啲，精神好啲。
珊：成日聽人話食得是福。一直以為飲食只係同身體健康有關，原來同精神健康都咁有關係！
林：係呀！所以記得揀飲擇食啦！我意思係揀好嘅、對腦部有益嘅食物嚟食呀！